Сотталушылар орындығында — кафенің жалға алушысы, автогаз құю станциясының директоры және газ тасымалдаушы. Прокуратура жалға алушының әрекеттерін ҚР ҚК 292-бабының 3-бөлігі бойынша, ал қалған екі сотталушыны ҚР ҚК 306-бабының 3-бөлігі бойынша саралады.
Тергеу барысында анықталған бұзушылықтар
Кафеде 32 қызметкер жұмыс істеген. Олардың екеуі көші-қон заңнамасын бұзған, ал он адам еңбек келісімшарттарынсыз еңбек еткен. Газ баллондары арнайы үй-жайда сақталмаған, ас үй келушілер залымен біріктірілген, ал газ жабдығы техникалық қызмет көрсету келісімшартсыз пайдаланылған.
Өрттен кейін тәркіленген бес баллонның пайдалану мерзімі 20 жылдан асқан және міндетті тексеруден өтпеген. Сараптама қорытындысы бойынша, жарылыстың себебі ас үйдегі баллоннан газдың ағуы және газ-ауа қоспасының тұтануы болған.
Зардап шеккендердің айғақтары
Қаза тапқан бармен Ританың анасы 26 ақпан күні кешке өрт туралы хабарлама алғанын айтты. Отбасы акимат пен кафе әкімшілігінен екі миллион теңгеден алып, сол қаражатқа Ақкөлде үй сатып алған.
Қаза тапқан даяшы Оксананың анасы қызы қайтыс болғаннан кейін 2007 жылдан бері кезекте тұрған тұрғын үйден бас тартқанын хабарлады. Ол 25 миллион теңгеге азаматтық талап қойған.
Келуші Сайлау Рахимжан мен оның жұбайы күйік шалып, Астанада емделген. Ер адам мерзімі өткен баллондарды пайдаланғаны үшін автогаз құю станциясының директорына талап қоюды жоспарлап отыр.
Денесінің 65%-ы күйік шалған аспаз Зарина Гиясова да станция директоры мен газ тасымалдаушыға талап қойған. Ол екі ай ауруханада жатқан және қазір өзін-өзі күте алмайды.
Соттың келесі отырысы бүгін Щучинскіде өтеді.